小松視像網誌

發明了數碼攝影機後, 記者便可放肆狂用閃燈, 總之有殺錯, 無放過, 只要你夠電力.　所以新一代Professional的定義，已不再是拍攝好與不好，而是有電定無電，有RAM定係還是不夠RAM. Pro 與 不Pro, 已經分不清了.
今天，你要做個Pro 人，唯有，依循達爾文的理論，最後留低的，才是強者！

Video:
Pro 人行天橋, 真功夫, 無花無假, 尤其有個型仔好似反丁!

第一時間報導: 剛看完達文西密碼, 結果, 好野!

好野, 因為這齣電影有許多估佢唔到的地方, 似足我! 而最估唔到, 是片長竟然有兩個半多鐘頭, 搞得眾人在戲院內出出入入,忙碌非常! 而且完場時厠所更被迫爆, 估唔到連男人小便都要排隊等候, 少有! 大口仔一下子吞不下!很辛苦！
另一好野, 是因為估佢唔到竟然高潮在最後最後最後的一刻, 正是主角發現瑪莉馬得蓮墓的真正位置, 竟是遠在天邊近在眼前. 公司有一同事就是因為被第一個「估佢唔到」, 搞到第二個「估佢唔到」都看不了！很失望！
第三個好野，當然是讚Dan Brown創作的這個故事確實很精彩，而導演又可以用短短時間交待一切，有聲又有畫，令到觀眾感覺很真實，竟然信以為真，認真地反應過來！所以完場時有人竟大喊，「車！有無搞錯！癡鬼線！」

事實上，我認為電影的達文西密碼可以歸納了四種票房巿場反應，一是唔好睇，二是唔明，所以唔好睇，三是好睇，但唔明，四是好好睇，因為明白晒！
反應（一）的人，相信因為教會的影響，又或者跟自己信仰產生大量的內部矛盾和衝突引起的不良性自我排斥的過敏性反應！
反應（二）的人，大都因為坊間的口碑或者宣傳關係，好奇入院觀看，最後心感完全被老點，因為達文西有乜密碼要被破解？點解最後又最重要的密碼是牛頓？點解聖杯不是杯？點解睇唔明？一般無宗教背景的人，必會多是產生反應（二），同時，他們會抱著很想破解他們心目中認為的「密碼」的心情去看，但最後發現密碼竟然不是一大堆數字！所以覺得離題．
反應（三）的人，是純粹因為電影效果而產生的反應，因為此片的畫面和配樂都很有震撼力，而且導演在細位的描寫很用力，尤其超close up的畫面特別多，加上在後半場的所用時空交疊的morphing，很具震撼力，同時在最後的一刻高潮，以很震撼的交響樂配襯，由上（天）而下（地），穿過羅浮宮玻璃和兩個三角交疊位至下面的墓穴時，那種莊嚴和震撼令毛髮直豎．視聽效果的一流，相信DVD會成為試音碟！
反應（四）的人，相信會是因為看完Dan Brown的小說，然後發現有許多地方不太明白，但看電影後就一一明白了．好像，大家都未見過Cryptext機器的真正樣子！但電影就清楚地解釋了設計．同時，看了電影後會更明白一些抽象的意境，例如，Tom Hanks在最後一幕於發現墓穴位置時，像玫瑰騎士般在星空下下跪，此種意境，看小說，有時真的未必可以意會到．

香港人的戾氣已達極點. 失去理智, 語無倫次, 都是多得董建華!

最近阿叔以大粗罵銷售員, 成為城中話題. 又難怪, 阿叔真係好大壓力(睇得出), 竟然又遇上一個半Peaaa不溫不火的銷售員在擾攘, 搞得阿叔肝火上腦, 失去理智要求雙方「手查」手道歉才肯罷休. 車上乘客又若無其事的繼續當無事發生, 阿叔當然可以擺明車馬怒小青年, 而且過程更被超定HD手機拍攝, 又有人配合創作特別版本Trailer和Remix主題曲, 熱潮可謂繼譚詠麟開四十場演唱會之後, 外界氣氛從未回此熾熱, 真的一時無兩, 甚至電影界老闆都不得不要寫個服宇, 據說這片段已超過二百多萬人次下載收看, 誰說香港無票房. 即使每人收一毫下載, 都肯定可收二萬!

不過話說回頭, 我想問, 這是真罵, 還是又只是一次行為藝術表演? 阿叔莫非係K哩啡一名? 青年人其車係導演? Cam man就坐在隔鄰扮偷拍, 一take過, 多好戲! 唔該各位電影人快啲學習, 甚麼叫做好題材? 有眼你睇, 咪經常賴翻版下載, 無好題材好劇本就亂拍亂剪亂做特技, 最後都是垃圾一件!

但無論如何, 阿叔的小小聲, 已經激起人們心目的戾氣, 每當大家茶餘飯後講到此阿叔, 都會投入角色, 互說對策, 其間, 肝火不其然都會上腦, 越講越火滾! 阿叔不單是把自己的戾氣乘機爆發, 就連收看的二百多萬人次的那些人都會睇到心火盛, 氣頂上腦, 想打爆電視! 此無他, 因為打開公仔箱就正在播火舞黃沙, 劇情集集都罵人收場, 又是小小聲, 全村人無一人是顏面寛容, 唔知, 你一定以為沙漠無水飲會心火盛! 事實上, 我們香港人就是生活在一個周圍都佈滿藥引的地方, 而傳媒記者編劇都會準時為你點火, 令到大家睇到眼火爆, 心想真想要燒死不祥人, 又話家春分是淫婦……,總之, 你睇見King Sir被明鳳激到變倒U咀, 就知道, 其實阿叔當時的心情, 就是因為受 火舞黃沙影響. 一時將劇情帶到現實, 一時分不清. 所謂人生如戲, 戲如人生!

其實, 要減壓真的話咁易! 巴士公司人員只要停用冷氣巴士, 改回用普通巴士, 大家只要在車上焗桑那足一粒鐘, 出一身大汗, 加速新陳代謝, 當做運動, 自然戾氣即消! 即使想破口大罵, 青年人一身臭汗, 阿叔自然無Mood! 另一方法, 就是睇天意, 靠天劫, 大家如果記得沙士期間, 你有無見過香港人充滿戾氣去小人?

我唸無囉!